Бұл құжаттардың көпшілігі мемлекет үшін маңызы зор, көшірмесі жоқ және түпнұсқасы біздің мұрағатта сақтаулы. Мұрағаттық қорлардың мазмұны да ерекше болып табылады. Қызмет бейініне қарай мұрағатта: Қазақстан Республикасы Білім және ғылым министрлігінің орталық аппаратында және оның алдында болған ұйымдарда 1927 – 1996 жылдар аралығында қызмет атқарған, қызметтен босатылған азаматтардың жеке істері, Қазақстан Республикасы Ұлттық Ғылым академиясының басқару органдарының құжаттары; Қазақстан Республикасы Білім және ғылым министрлігі орталық аппаратының құжаттары, басқару құжаттамасы, ғылыми – техникалық құжаттамасы, ғылыми – зерттеушілік құжаттамасы, диссертациялық жұмыстар және жеке құжаттар сақтаулы. Баршаға мәлім, Қазақстан Республикасы Ұлттық Ғылым академиясының алғашқы құрамына ғылым, техника және мәдениет салаларының көрнекті қайраткерлерінен тұратын 14 академик және 16 корреспондент-мүшелері кірді.

Ғылым академиясының бірінші жалпы жиналысында оның президенті болып қазақ және Кеңес Одағының геологы, қоғам қайраткері, қазақтан шыққан тұңғыш академик Қаныш Сәтбаев сайланды. Сонымен қатар, мұрағатта ірі ғалымдардың ғылыми еңбектері, өмірбаяндық құжаттары, қолжазбалары, ғылым және мәдениет қайраткерлерінің хаттары мен фотосуреттері жинақтаулы. Атап айтсақ, Қазақ КСР Ғылым академиясының толық және корреспондент мүшелері: тарихшылар – Е.Б. Бекмаханов, Г.Ф. Дахшлейгер, Т.Е. Елеуов, А.Н. Нүсіпбеков, С.Н. Покровский; әдебиеттанушылар: Н.Т. Сауранбаев, М.С. Сильченко; экономистер: Г.Ч. Чуланов, А.К. Қуанышев, С.Б. Бәишев; археологтар: Г.И. Пацев, Х.А. Алпысбаев, химик: М.И. Горяев, А.Б. Бектұров, ботаник: В.П. Михайлов, геологтер: Барбот де Марин, В.К. Монич, Г.Н. Щерба; математиктер: Т.И. Аманов, К.П. Персидский; металлургтер: А.Л. Цефт, В.Д. Пономарев, М.А. Соколов; астраном: Г.А. Тихов; топырақ зерттеуші: А.И. Безсонов және т.б.